"Барселона" Месси ва яна бошқа собиқ футболчилари олдидаги қарзларини ёпди

"Барселона"нинг молиявий аҳволи аста-секин яхшиланмоқда. Испаниянинг Sport нашри хабарига кўра, Каталония клуби бутун дунёда коронавирус пандемияси авж олган 2020 йилда маош олишни кечиктиришга рози бўлган футболчилар олдидаги сўнгги қарзларини ёпган. Охирги тўлов 16 миллион еврони ташкил этди. Пуллар Лионель Месси, Филиппе Коутиньо, Рональд Куман ва бошқаларга кетди.

Лионель Месси 2021 йилда "Барселона"ни тарк этганди. Ўшанда молиявий қийинчиликлар туфайли "кўк-анорранглилар" аргентиналик футболчига янги шартнома таклиф қила олмаган. Месси "ПСЖ"га йўл олди ва у ерда икки мавсум ўтказди, шундан сўнг "Интер Майами"га ўтди. Юлдуз аргентиналикнинг амалдаги шартномаси 2025 йил охиригача мўлжалланган.