Австрияда болалар озуқасига каламуш заҳрини қўшиб қўйган шахс қўлга олинди

Мамлакатнинг Залцбург федерал ерида болалар озуқасига заҳар қўшиб қўйган 39 ёшли эркак қўлга олинди.

"Kronen Zeitung" нашрининг хабар беришича, жиноятчи ўз ҳаракатларини пул ишлаш мақсадида амалга оширган: у Германиянинг "HiPP" компаниясидан 2 миллион евро миқдорида криптовалюта талаб қилган.

Жиноятчи супермаркетлардан болалар озуқасини сотиб олиб, ичига заҳар қўшган ва сўнгра банкаларни қайтадан пештахталарга қўйиб чиққан. Тергов ҳаракатлари 38 кун давом этди ва унда Австрия, Чехия ҳамда Словакия ҳуқуқ-тартибот идоралари иштирок этди. Ҳозиргача заҳарланган бешта банка топиб мусодара қилинди — улар пастки қисмидаги оқ-қизил рангдаги стикер орқали аниқланган. Айни пайтда Австрия ҳудудида олтинчи заҳарланган банка қидирилмоқда.

39 ёшли жиноятчи супермаркетлардаги кузатув камералари ва "HiPP" компаниясига юборган электрон хати орқали топилди. Ҳозирда прокуратура қўлга олинган шахсга нисбатан қандай айблов эълон қилишни кўриб чиқмоқда — у саломатликка оғир шикаст етказишга уриниш ёки қасд қилиш моддалари бўйича жавобгарликка тортилиши мумкин.