Австралия Тайван учун уруш бошланган тақдирда ўзига ҳеч қандай мажбуриятни олмайди

Австралия, агар Хитой Тайванга ҳужум қилса, АҚШ тарафида ҳарбий амалиётларда иштирок этишни олдиндан ваъда қилмаслигини айтди. Бу Вашингтоннинг чақириғига Канберранинг жавоби.

Агар Хитой Тайванга ҳужум қилса, Австралия олдиндан АҚШ тарафида ҳарбий амалиётларда иштирок этиш мажбуриятини олмайди. 13 июль, якшанба куни Австралия радиоэшиттириш корпорациясига (ABC) мудофаа саноати вазири Пэт Конрой “Австралия қўшинларини исталган можарога жўнатиш тўғрисидаги қарорни ҳукумат зарур бўлганда қабул қилади, олдиндан эмас”, деди. У Австралия ўз суверенитетини биринчи ўринга қўйишини таъкидлади.

12 июль куни Financial Times газетасининг хабар беришича, АҚШ Мудофаа вазирининг ҳарбий-сиёсий масалалар бўйича ўринбосари Элбриж Колби сўнгги ойларда АҚШнинг Осиё-Тинч океани минтақасидаги энг муҳим иттифоқчилари бўлмиш Австралия ва Японияни Тайван бўйича можаро авж олган тақдирда ўз режаларини ошкор қилишга чақирган. Ўша куни Колби Х ижтимоий тармоғида Пентагон “президентнинг биринчи Америка дастурини амалга оширишга эътибор қаратгани”, бу “иттифоқчиларни мудофаа харажатларини оширишга ва жамоавий мудофаа билан боғлиқ бошқа саъй-ҳаракатларни рағбатлантириш”ни ўз ичига олганини ёзган. АҚШ расмийси Европа давлатларининг Дональд Трамп талаб қилганидек, мудофаа харажатларини ошириш қарорини ижобий мисол сифатида келтирди.

Австралия Бош вазири Энтони Альбанезе бу хабарларга изоҳ беришдан бош тортди. Альбанезе яқинда Канберра Тайваннинг статус-квосини, яъни унинг материк Хитойдан де-факто мустақиллигини қўллаб-қувватлашини айтди, деб хабар беради dw.com.