Асаднинг пуллари: Сурияда қанча, қандай ишлаб топилган ва ҳозир қаерда?

Суриянинг ҳокимиятдан ағдарилган диктатори Башар ал-Ассад ва унинг оиласининг қанча пули борлигини ҳеч ким билмайди. Энг тўғри ва эҳтимол фактларга асосланган ҳисоб АҚШ Давлат департаменти томонидан 2022 йилда Конгрессга тақдим этилган ҳисоботда берилган – Асад ва унинг рафиқаси Асманинг шахсий бойлиги 2 миллиард долларга етиши мумкин.

Асад оиласининг Дубай, Москва ва Лондонда кўчмас мулки ва ўнлаб махфий банк ҳисоб рақамлари борлиги кўрсатилган. Масалан, Британия ОАВлари Сурияда фуқаролар уруши бошланиши билан Британия расмийлари Асаднинг HSBC банкининг Лондон бўлимидаги 40 миллион фунт стерлинг билан ҳисобини музлатиб қўйгани ҳақида хабар берди.

Миллиард долларлик шахсий бойлик Асад оиласи бойлигининг кичик бир қисми бўлиши мумкин. Бошқа, камроқ консерватив ҳисоб-китобларга кўра, у 200 тонна олтин ва тахминан 22 миллиард долларлик активларга эга. Айрим кузатувчилар ҳатто Асадларнинг бойлиги, жумладан, яширин активлари 122 миллиард долларга етиши мумкинлигини тахмин қилишмоқда.

Мусодара қилинган ҳисоб ва мулклар ҳақидаги маълумотлар, шунингдек, Асаднинг қариндошлари, масалан, амакиваччаси Рами Махлуф иштирокидаги суд жараёнлари ҳокимиятдан ағдарилган президент ва унинг яқинлари Сурия иқтисодидан қанча пул ўтказиб юборганининг яна бир далилидир.

Бойлиги 5 миллиард доллардан 10 миллиард долларгача баҳоланган Рами Махлуф Асаддан кейин Суриядаги энг бой одам ҳисобланиб келинди, то у билан жанжаллашиб қолди. 2016 йилда Асаднинг яна бир амакиваччаси Ҳофиз Махлуфнинг банк ҳисоби пул ювишда гумон қилиниб, Швейцарияда музлатилган эди. Унинг ҳисобида 3,2 миллион доллар бор эди.