АҚШнинг Украина ва Россия бўйича махсус вакили тайинланади

Кейт Келлогг АҚШнинг Украина ва Россия бўйича махсус вакили этиб тайинланади.

Келлоггнинг ушбу лавозимга тайинланишини Доналд Трампнинг ўзи эълон қилди. Кейт Келлогг Трампнинг биринчи президентлик муддати давомида аллақачон АҚШ президентининг миллий хавфсизлик бўйича маслаҳатчиси вазифасида фаолият юритган.

Истеъфодаги генерал июн ойида тақдим этилган Россиянинг Украинага қарши урушини тугатиш режаси муаллифларидан бири. Ушбу режага кўра, Киев Москва билан музокараларни бошласа, Вашингтондан кўпроқ қурол олиши мумкин. Россия музокаралардан бош тортган тақдирда, АҚШ томонидан Украинани қўллаб-қувватлаш кучайтирилиши ҳақида огоҳлантирилади.

Бундан ташқари, Россиянинг музокараларда иштирок этишини рағбатлантирувчи омиллардан бири Оқ уй томонидан Украинанинг NATO'га аъзолигини узоқ муддатга кечиктириш ҳақидаги эҳтимолий ваъдаси бўлиши мумкин.