АҚШ яқин беш йил ичида ядровий қурол тарқалишининг янги босқичини башорат қилмоқда

Қўшма Штатлар яқин беш йил ичида ядровий қуролларнинг тарқалиши ва янги ядровий давлатлар пайдо бўлишини кутмоқда.

Бу ҳақда АҚШ Мудофаа разведка бошқармаси директори генерал-лейтенант Жеффри Круз АҚШ Сенатининг разведка бўйича махсус қўмитасининг тингловида маълум қилди.

Унинг сўзларига кўра, Америка разведка ҳамжамияти ядровий қуролларнинг тарқалиши, шунингдек, уларнинг эволюциясини фаол кузатиб боради.

"Сайёрамизда ким ядро қуролига эга эканлигини, улар қандай турдаги ва ўлим даражасига эга бўлишини тушунишимиз керак. Ўтган беш йил ичида вазият кескин ўзгарди, кейинги беш йилда ҳам ўзгаришлар давом этади", - деди Круз.

Шунингдек, у ўзининг олдини олиш стратегиясига эга бўлган янги ядровий мамлакатларнинг пайдо бўлиши дунёдаги вазиятни мураккаблаштириши ва Вашингтоннинг сиёсий қарорларига, жумладан, қуролли можаролар соҳасида ҳам таъсир қилишини таъкидлади.

Бундан ташқари, тингловларда СССР парчаланганидан кейин Россияга ўтказилган Украина ядровий арсеналига оид масала ҳам муҳокама қилинди.

Сенатор Жон Корнин Киевнинг ядровий мақомдан воз кечганини эслади, бунга Круз шундай жавоб берди: “Украина бошқаларни ҳимоя қилиш учун ўз ихтиёри билан қуролларидан воз кечди”.