АҚШ визасини олиш учун ижтимоий тармоқларингизни кўрсатишингиз керак бўлади

АҚШ Давлат котиби Марко Рубио визага мурожаат этувчиларни ижтимоий тармоқларда текширишни , Исроил ёки АҚШга “душманлик” кўрсатганларнинг киришига тўсқинлик қилишни буюрди. Бу ҳақда The New York Times газетаси 25 мартдаги ички телеграмма ва Давлат департаментидаги манбаларга таяниб хабар берди.

Талабалар ва алмашинув дастурлари иштирокчиларига алоҳида эътибор қаратиш бўйича топшириқ берилди: эндиликда шубҳа туғилса, уларнинг аризалари ижтимоий тармоқлардаги фаолиятини мажбурий текшириш учун фирибгарликка қарши курашиш бўлимига ўтказилиши керак. Агар хатти-ҳаракатлар “АҚШ фуқаролари, маданияти, институтлари ёки тамойилларига душманлик” деб топилса, виза рад этилиши мумкин.

300 дан ортиқ визалар, асосан талабалар учун, бекор қилинди, деди Рубио. У: “Сенга ўқишинг учун виза берилади, норозилик билдиришинг учун эмас”, деди.

Ушбу сиёсат фонида Қўшма Штатларда депортация ҳолатлари кузатилди. Хусусан, туркиялик Fulbright олими Рюмейса Озтюрк Исроилнинг Ғазодаги ҳаракатларини танқид қилувчи мақола чоп этганидан сўнг Массачусетс штатида ICE агентлари томонидан ҳибсга олинган эди. Унинг адвокатлари ХАМАСга алоқадорлиги ҳақидаги айбловлар асоссиз ва унинг ҳибсга олиниши унинг сиёсий фаоллиги билан боғлиқ, дейди.

Давлат департаменти ички кабел ҳақида изоҳ беришдан бош тортди, бироқ 2019-йилдан бери виза аризалари ижтимоий тармоқлардаги профилларга ҳаволалар сўралаётганини таъкидлади.