АҚШ ва Хитой TikTok бўйича асосий келишувга эришди

TikTok’нинг АҚШдаги тақдири борасида кўп йиллик тортишув кейин икки давлат умумий келишувга эришди, якунловчи қарор Трамп ва Си Жинпинг мулоқотидан сўнг маълум бўлади.

Доналд Трамп маъмурияти ва Хитой ўртасида TikTok’ни АҚШда фаолиятда қолдириш учун асосий келишувга эришилди. Бу ҳақда АҚШ Молия вазири Скотт Бессент маълум қилди. Трамп жума куни Хитой раҳбари Си Жинпинг билан учрашиб, келишувни якунлайди. Бу музокаралар икки давлат раҳбарлари орасидаги кенгроқ учрашувга замин яратиши мумкин.

«Америка Қўшма Штатлари ва Хитой ўртасидаги Эвропадаги йирик савдо учрашуви ЖУДА ЯХШИ ўтди! Тез орада якунланади. Мамлакатимиз ёшлари сақлаб қолишни жуда истаган “айрим” компания бўйича ҳам келишувга эришилди. Улар жуда хурсанд бўлишади! Мен жума куни Президент Си билан гаплашаман. Ўзаро муносабатлар жуда кучли бўлиб қолмоқда!!! », — деб ёзди Трамп Truth Social’да.

Маълумотларга кўра, келишув шартлари орасида TikTok’нинг америкалик инвесторлар иштирокида қайта ташкил қилиниши, миллий хавфсизлик талаблари таъминланиши ҳамда компания маълумотлари устидан АҚШ томонидан назорат кучайтирилиши назарда тутилган. Oracle компанияси раҳбари Ларри Эллисон асосий харидор сифатида тилга олинмоқда.

Хитойнинг етакчи музокарачиси Ли Ченгганг келишув орқали нафақат TikTok масаласи ҳал бўлиши, балки икки давлат ўртасида савдо ва инвестиция соҳаларидаги тўсиқлар қисман бартараф этилиши мумкинлигини таъкидлади. Унинг айтишича, Пекин ўз миллий манфаатларига зид келишувга рози бўлмаслиги очиқ билдирилган.

TikTok ва унинг эгаси ByteDance ҳозирча шарҳ бермаган. Бироқ келишувсиз компаниянинг АҚШда фаолият юритиши мумкин эмас эди. Мутасаддиларнинг айтишича, ҳозирги келишув Трамп ва Си Жинпингнинг октябр ойига режалаштирилган учрашувига йўл очиши мумкин.