АҚШ ва унинг иттифоқчилари Хитойнинг нодир ер элементларига қарамликни камайтириш йўлларини муҳокама қилди

АҚШ ва унинг иттифоқчилари Хитойнинг нодир ер элементларига қарамликни камайтириш йўлларини муҳокама қилди — Reuters.

Агентлик хабарига кўра, учрашув АҚШ молия вазири Скотт Бессент ташаббуси билан ўтказилган. Унда G7 аъзолари — Япония, Буюк Британия, Франция, Германия, Италия, Канада ва АҚШ молия вазирлари, шунингдек, Австралия, Мексика, Жанубий Корея ва Ҳиндистон вакиллари иштирок этган. Шу билан бирга, АҚШ савдо вакили Жеймисон Грир, АҚШ Экспорт-импорт банки ва JP Morgan вакиллари ҳам қатнашган. Аммо учрашув якунлари бўйича қўшма баёнот берилмаган.

АҚШ Молия вазирлигининг маълум қилишича, Бессент иштирокчилар билан муҳим минераллар, айниқса нодир ер элементлари бўйича таъминот занжирларини ҳимоя қилиш ва диверсификациялаш ечимларини муҳокама қилишни кўзлаган. У мамлакатлар Хитойдан тўлиқ узилиш эмас, балки хавф остидаги соҳаларда қарамликни камайтириш йўлини танлашига умид билдирган.

Шунингдек мақолада, Бессент учрашувда иштирокчиларни Хитойга боғлиқликни қисқартириш бўйича саъй-ҳаракатларни кучайтиришга чақиришини айтгани, Хитой сўнгги пайтларда нодир ер элементлари экспортига қатъий чекловлар жорий қилиб, жумладан Японияга етказиб беришни ҳам чеклагани келтирилган.

Япония молия вазири Сацуки Катаяма душанба куни кечқурун журналистларга нодир ер элементлари бўйича Хитойга қарамликни тезкор равишда камайтириш зарурлиги юзасидан келишув мавжудлигини, у G7 ва ҳамфикр давлатлар учун Хитойдан ташқари манбаларни мустаҳкамлашга қаратилган қисқа, ўрта ва узоқ муддатли сиёсат йўналишларини белгилашини билдирган.