АҚШ ва унинг иттифоқчилари Сурияда ИШИДга тегишли нишонларга кенг кўламли зарбалар берди

Бу ҳақда АҚШ Қуролли кучлари Марказий қўмондонлиги (CЕNTCOM) хабар қилди.

"Қўшма Штатлар президенти Доналд Трамп шанба куни зарбалар бериш тўғрисида буйруқ берди. Зарбалар “Hawkeye Strike” (“Лочин зарбаси”) операцияси доирасида амалга оширилган бўлиб, 13 декабр куни Сурияда АҚШ ҳарбий хизматчиларига қарши уюштирилган ва ўлимга олиб келган ИШИД ҳужумига жавоб сифатида ўтказилди", дейилади CENTCOM'нинг Х ижтимоий тармоғидаги баёнотида.

Қўмондонлик маълумотига кўра, зарбалар терроризмга қарши курашиш ҳамда минтақадаги АҚШ ва иттифоқчи кучларни ҳимоя қилиш мақсадида берилган.

Операция давомида АҚШ ва унинг ҳамкорлари 20 дан ортиқ самолёт иштирокида 35 дан зиёд нишонга 90 дан ортиқ юқори аниқликдаги ўқ-дориларни қўллаган, деб хабар беради CBS News.