АҚШ Украинага Россия ракеталари ҳақидаги разведка маълумотларини узатишни қайта тиклади

АҚШ Россиянинг яқинлашаётган баллистик ракеталари ҳақидаги разведка маълумотларини Украинага узатишни қайта тиклади. Бу ҳақда Украина президенти Владимир Зеленский маълум қилди.

Унинг сўзларига кўра, маълумот алмашинуви бир неча кунга тўхтатилган эди. Аввалроқ Россиянинг Киев ва бошқа шаҳарларга берган зарбаларидан кейин Зеленский Украина ҳамкорларидан олдиндан огоҳлантириш олмаганидан шикоят қилган ва бу инсонлар ҳаётини хавф остига қўяётганини таъкидлаган эди.

АҚШ разведка маълумотлари Украина ҳарбийларига Россия ракеталарининг тайёрланиши ва учирилишини, самолётларнинг парвозларини ҳамда эҳтимолий ҳужум нишонларини олдиндан аниқлашга ёрдам беради. Бироқ узатилаётган маълумотларнинг аниқ ҳажми ошкор этилмаган.

Зеленский NBC телеканалига берган интервьюсида АҚШ президенти Дональд Трампни Россия президенти Владимир Путин билан янада яқинлашишдан огоҳлантирди. У бундай қадамни «тарихий хато» деб атади.

Шу билан бирга, Украина раҳбари Вашингтон билан ҳамкорликни давом эттиришга умидини йўқотмаганини таъкидлади.

Киев ва Вашингтон ўртасидаги муносабатлар Трамп маъмурияти Россияга қарши санкцияларнинг айримларини вақтинча тўхтатиш ва Россия дизель ёқилғисини етказиб бериш бўйича келишувга эришиш тўғрисида қарор қабул қилганидан кейин кескинлашган эди.