АҚШ Сенати Россияга қарши "жаҳаннам санкциялари" қонун лойиҳасига тайёргарлик кўрмоқда

АҚШ Сенати келаётган ҳафтада Россияга қарши "жаҳаннам санкциялари" ҳақидаги қонун лойиҳасини овозга қўйишга тайёргарлик кўрмоқда

Axios нашри маълумотларига кўра, демократлар республикачиларга қонун лойиҳасини қўллаб-қувватлашга тайёр эканликларини билдиришган.

Бу Сенатда камдан-кам учрайдиган, 60 дан ортиқ ҳаммуаллифга эга бўлган икки партиявий ютуққа айланиши мумкин, деб ёзади агентлик.

​Ҳужжатнинг кўриб чиқилиши ўз ҳаётининг сўнгги кунларида ушбу қонун лойиҳасини илгари сурган сенатор Линдси Грэм хотирасига бағишланган хотира маросими фонида ўтади. Унинг 11 июлдаги вафотидан сўнг лойиҳа икки марта қайта кўриб чиқилди.

​Сенаторлар иккиламчи божларнинг максимал ставкасини 500 фоиздан 100 фоизгача пасайтирганликлари ва Трамп уларга қарши чеклов киритиши мумкин бўлган давлатлар сонини Россия нефти ва газининг энг йирик бешта харидори билан чеклаб қўйганликлари ҳақида аввал хабар берган эдик.

​Axios’нинг ёзишича, президентнинг талаби билан пакетга Эронга қарши санкцияларни узайтириш ҳам қўшилган. Трамп аввалроқ шундай бўлган тақдирда қонун лойиҳасини қўллаб-қувватлашини маълум қилган эди.

​Бироқ ҳозиргача жамоатчиликка тақдим этилган қонун лойиҳаси версияларида Эрон тилга олинмаган.

​Шу билан бирга, ҳужжатнинг охирги таҳрири Трамп зиммасига шахсан Путинга ва Россия олий раҳбариятига қарши санкциялар киритиш мажбуриятини юклаган эди.

​Қонун лойиҳаси Сенат томонидан қўллаб-қувватланган тақдирда ҳам, у ҳали Вакиллар палатаси томонидан маъқулланиши керак. Трамп Конгресс томонидан қабул қилинган ҳужжатни имзолашга мажбур эмас ва унга вето қўйиши мумкин. Уни енгиб ўтиш учун иккала палатада ҳам овозларнинг учдан икки қисми талаб қилинади.