АҚШ Россиянинг Украинадаги жиноятларини тергов қилаётган халқаро гуруҳдан чиқди – NYT

Нашр манбаларига кўра, Қўшма Штатлар Адлия вазирлиги Европадаги ҳамкорларига Украинага қарши тажовуз жинояти бўйича халқаро суд таъқиби марказидан чиқиши ҳақида хабар берган.

Вашингтон ушбу гуруҳга 2023 йилда президент Жо Байден даврида қўшилган эди. Гуруҳнинг мақсади Россия ва унинг иттифоқчилари — Беларус, КХДР ва Эрон раҳбариятини Украинага қарши тажовуз учун жавобгарликка тортишдан иборат ҳисобланади.

АҚШ гуруҳ таркибидаги Европадан ташқаридаги ягона давлат бўлиб, Вашингтон Адлия вазирлигининг юқори мартабали прокурорини Гагага юборган эди. Америкалик прокурор Гаагада Украина, Болтиқбўйи давлатлари ва Руминия терговчилари билан ҳамкорлик қилган.

Бундан ташқари, The New York Times маълумотларига кўра, Трамп маъмурияти 2022 йилда АҚШнинг ўша пайтдаги Бош прокурори лавозимини эгаллаган Меррик Гарланд томонидан ташкил этилган Уруш жиноятларини тергов қилиш гуруҳининг фаолиятини ҳам қисқартирмоқда.