АҚШ қуламоқда: Дунёнинг энг кучли иқтисодиёти инқироз ёқасига етиб келди

CNN телеканали томонидан эълон қилинган таҳлилга кўра, илгари барқарор кўринган АҚШ иқтисодиёти президент Доналд Трампнинг иқтисодий сиёсати туфайли юзага келган кучли ноаниқлик сабабли инқироз остонасида турибди.

АҚШ фонд бозорлари сўнгги олти ой ичидаги энг оғир даврни бошдан кечирмоқда: S&P 500 индекси уч ҳафта ичида тахминан 9 фоиз пасайди. CNN'нинг бозор кайфиятлари индекси ("Fear & Greed Index") "ўта қўрқув" даражасига тушди.

Иқтисодчилар инвесторлар орасидаги хавотирнинг ортишини Трампнинг тариф сиёсатининг кутилмаганлиги билан боғламоқда, бу эса иқтисодий ўсишга салбий таъсир кўрсатмоқда. Март ойи бошида Вашингтон Хитой товарларига қўшимча 10 фоизлик божхона тўловларини жорий этди, бу эса Пекиннинг жавоб чораларига олиб келди ва бозордаги ноаниқликни кучайтирди.

Goldman Sachs банки таҳлилчилари келгуси йил ичида АҚШда инқироз эҳтимолини 20 фоизга кўтарди ва агар Трамп маъмурияти тариф босими сиёсатини давом эттирса, хавфлар янада ошиши мумкинлиги ҳақида огоҳлантирди.