АҚШ нега Жанубий Африка элчиси Иброҳим Расулни мамлакатдан чиқариб юборди?

Жанубий Африкадаги мухолиф партиялар Вашингтон элчи Иброҳим Расулни мамлакатни тарк этиши учун атиги 72 соат вақт берганидан кейин мамлакат президентини АҚШ босимига бош эгмасликка чақирди.

Расул ўтган ҳафта АҚШ Давлат котиби Марко Рубио уни "Америкадан нафратланадиган ирқий нафрат сиёсатчиси" деб атагани учун персона нон грата деб эълон қилинди.

Доналд Трамп АҚШ президенти бўлганидан кейин Жанубий Африка ва Қўшма Штатлар ўртасидаги таранглик давом этмоқда. Бироқ, Жанубий Африканинг халқаро алоқалар вазири Роналд Ламола SABC давлат телерадиокомпаниясига "Тwitter орқали дипломатия" "бориш йўли" эмаслигини ва давлатлар вазиятни "юзма-юз" муҳокама қилишлари кераклигини айтди.

Бошқа сиёсатчилар ўз баёнотларида камроқ тийилишди. Жулиус Малема бошчилигидаги мухолифатдаги Иқтисодий эркинлик курашчилари партияси АҚШга қарши кескин баёнот чиқариб, Жанубий Африка президенти Кирил Рамафосани “мамлакатни Оқ уйни эгаллаб олган қизил бошли масхарабоз қўрқитишига йўл қўймасликка” чақирди.

Азания Пан-Африкачилар Конгресси Бош котиби Апа Пуи ҳам АҚШ қарорини қоралаб, уни Жанубий Африка суверенитетига ҳужум ва мамлакатдаги сиёсатни ўрнатишга уриниш деб атади. “Жанубий Африка Қўшма Штатларнинг қўғирчоғи эмас, биз ўз давлатимизни ҳеч қандай аралашувсиз бошқаришга ҳақлимиз”, - деди у.

Трамп аввалроқ Жанубий Африканинг мунозарали ер қонунини танқид қилган эди, бу қонун ҳукуматга маълум шароитларда товонсиз ерларни мусодара қилиш имконини беради. Ўтган ой Трaмп, Голланд ва Франция кўчманчиларининг авлодлари бўлган оқ африканер озчилигига нисбатан камситиш борлигини айтиб, Жанубий Африкага ёрдамни тўхтатди. Жанубий Африка буни рад этади.

Расул аввалроқ Барак Обама президент бўлган 2010-2015 йилларда АҚШ элчиси бўлиб ишлаган. У аввалги тажрибаси ва Вашингтондаги кенг алоқалар тармоғи асосида 2024 йилда элчи этиб қайта тайинланган. Бироқ, обрўсига қарамай, у Трамп билан учрашувларни таъминлашда қийинчиликларга дуч келди. Исми ошкор этилмаган жанубий африкалик дипломатлардан бири Semafor ахборот веб-сайтига "Фаластинни қўллаб-қувватлаган сиёсат тарихи" бўлган киши "ҳозирги вақтда бу ишни муваффақиятли бажара олиши" даргумон эканлигини айтди.

Жанубий Африка Миллий Бирлик Ҳукуматининг коалиция ҳамкори бўлган Демократик Алянс (ДА), нима учун энг йирик партия Африка Миллий Конгресси ҳали ҳам барча хорижий дипломатларни танлаётгани ҳақида чалкашлик билдирди. DА матбуот котиби Вилли Аукамп SABC'га ГНУ аъзоларини кескинликни юмшатиш учун Вашингтонга боришга чақириб, "АНC ташқи сиёсат ва дипломатларни тайинлаш бўйича карт-бланшга эга бўлиши шунчаки нотўғри" деди.