АҚШ Мадурога нисбатан қандай режалар тайёрлаяпти?

АҚШ расмийлари Венесуэла президенти Николас Мадурога нисбатан Вашингтон кўриши мумкин бўлган янги чора-тадбирлар ҳақида ОАВга маълумот берди.

АҚШ яқин кунларда Венесуэла бўйича янги операциялар босқичини бошлашга тайёрланмоқда. Бу ҳақда Reuters агентлигига тўрт нафар америкалик амалдор хабар берди.

Манбаларнинг айтишича, операцияларнинг аниқ санаси ва кўлами ҳали маълум эмас, шунингдек президент Дональд Трамп уларни амалга ошириш юзасидан якуний қарор қабул қилган-қилмагани аниқлашмаган. Шунга қарамай, манбалар бу операциялар Мадурога қарши янги босқичнинг биринчи фазаси бўлиши эҳтимолини таъкидлашган.

Тўртала манба ҳам АҚШ режаларининг махфийлиги туфайли ўз исмини ошкор этмаслик шартида гапирган.

Пентагон Reuters’нинг саволларини Оқ уйга йўналтирган. Марказий разведка бошқармаси эса изоҳ беришдан бош тортган.

Шанба куни АҚШ маъмуриятининг юқори лавозимли бир вакили Венесуэлага нисбатан “ҳеч қандай вариант четга сурилмаслигини” таъкидлаган.

«Президент Трамп мамлакатимизга наркотиклар оқимини тўхтатиш ва айбдорларни жавобгарликка тортиш учун Америка қудратининг барча элементларидан фойдаланишга тайёр», — деди у анонимлик шартлари асосида.

Трамп маъмурияти турли сценарийларни кўриб чиқмоқда. АҚШ Мадурони АҚШга ноқонуний наркотиклар етказиб беришда муҳим рол ўйнаяпти, деб ҳисоблайди. Мадуронинг ўзи эса бу айбловларни рад этади.

Икки манбанинг Reuters’га билдиришича, муҳокама қилинаётган вариантлар орасида Мадурони агдариш ҳаракати ҳам бор.

2013 йилдан бери ҳокимиятда бўлиб келаётган Мадуро Трамп уни ҳокимиятдан четлатишга интиляпти, деб ҳисоблайди ва «Венесуэла фуқаролари ва армияси бундай уринишларга қаршилик кўрсатишини» таъкидлаб келади.

Шу билан бирга, АҚШнинг Кариб денгизидаги ҳарбий фаолияти бир неча ойдан бери кучайтирилмоқда. ОАВ маълумотларига кўра, Трамп Венесуэлада ЦРУнинг яширин операцияларини ҳам санкциялаган.

Жума куни АҚШ Федерал авиация маъмурияти йирик авиакомпанияларни Венесуэла ҳудуди устидан парвозлар вақтида “потенциал хавфли вазият” юзага келиши мумкинлиги ҳақида огоҳлантирди ва эҳтиёткорликка чақирди.