АҚШ келишув бўйича Украинадан қарши таклиф кутмоқда

Қўшма Штатлар Украинадан можарони ҳал қилиш бўйича қарши таклифни кутмоқда, уни президент Владимир Зеленский ва унинг жамоаси 18 август куни Вашингтонда тақдим этади. Бу ҳақда АҚШнинг НАТОдаги доимий вакили Мэтью Уитэкер Fox News телеканалига берган интервьюсида айтиб ўтди.

"Ўйлайманки, биринчи навбатда, биз Зеленский ва унинг жамоаси Оқ уйга Россиянинг Аляскадаги таклифига қарши таклиф билан келишса, бу кейинги муҳим қадам бўлади", - деди дипломат.

Аввалроқ The New York Times АҚШ президенти Дональд Трамп Зеленский билан телефон суҳбатида тинчлик келишуви эвазига Донбассдаги ҳудудларни Россияга беришни таклиф қилгани ҳақида ёзган эди. Украина раҳбари бу фикрни рад этди.