АҚШ “Kartel de los Soles”ни террорчилик ташкилоти деб эълон қилди

АҚШ Венесуэланинг “Kartel de los Soles” жиноий гуруҳини расман Хорижий террорчилик ташкилотлари (FTO) рўйхатига киритди. Қарор кучга кириши билан гуруҳга тегишли ёки Америка фуқаролари назоратидаги барча активлар музлатилади, улар билан ҳар қандай битимлар тақиқланади.

Шунингдек, ушбу картел билан ҳамкорлик қилган хорижий молия муассасалари АҚШнинг иккламчи санкцияларига учраши мумкин.

АҚШ Давлат котиби Марко Рубио “Kartel de los Soles”, “Tren de Aragua” ва “Sinaloa” каби гуруҳларни ярим шарда зўравонлик ва наркотрафикнинг кескин ўсиши учун жавобгар деб атади. У Венесуэла президенти Николас Мадуро ва юқори амалдорларни картелни қўллаб-қувватлашда айблади.

Вашингтоннинг Лотин Америкаси наркотик тармоқларига қарши сиёсати доирасида АҚШ кема ва сув ости кемаларини Венесуэла қирғоқларига жойлаштирган. Каракас бу ҳаракатларни халқаро ҳуқуқни бузиш деб танқид қилмоқда.

Маълумотларга кўра, АҚШнинг энг йирик авиаташувчиси USS Gerald R. Ford ҳам минтақадаги амалиётларда иштирок этмоқда.