АҚШ ҳарбийлари "Трен-де-Арагуа" тўдаси раҳбари Нино Геррерони йўқ қилди

Операция Венесуэла кучлари билан ҳамкорликда Трампнинг буйруғига биноан ўтказилди.

Қўшма Штатлар ҳарбийлари Венесуэла кучлари билан мувофиқлаштирилган ҳолда, Доналд Трампнинг буйруғига биноан Венесуэланинг энг йирик "Трен-де-Арагуа" жиноий тўдаси етакчиси Нино Геррерони ўлдирди. Бу ҳақда Трамп Truth Social тармоғида ёзиб қолдирди.

"Менинг кўрсатмамга биноан АҚШ Қуролли Кучларининг Жанубий қўмондонлиги тезкор ва ҳалокатли кинетик зарба бериб, сайёрадаги энг вахший террорчилик ташкилотларидан бири — "Трен-де-Арагуа"нинг машъум раҳбари Нино Геррерони муваффақиятли йўқ қилди", — деб ёзади Трамп.

Унинг қўшимча қилишича, АҚШ ҳалок бўлганлар, уларнинг оилалари ва яқинлари учун қасос олган. Президентнинг сўзларига кўра, у ўз маъмурияти иш бошлаши биланоқ ушбу тўдани хорижий террорчилик ташкилотлари рўйхатига киритган, "минглаб хавфли жиноятчиларни" депортация қилган ва "картелларга қарши уруш" эълон қилган.