АҚШ федерал судлари тизими хакерлар томонидан бузилди

Хакерлар АҚШнинг федерал суд ҳужжатлари сақланувчи тизимини бузиб кириб, бир нечта штатларда махфий маълумотларни ошкор қилишди.

АҚШнинг федерал суд ҳужжатларини сақлаш тизими кенг кўламли хакерлик ҳужумига учради. Бу ҳақда Politico нашри манбаларга таянган ҳолда хабар берди.

Манбаларнинг айтишича, бузғунчилар бир қатор округ судларига кириб, жиноят ишларида иштирок этган маълумот берувчиларнинг шахсий маълумотларига эга бўлган бўлиши мумкин. Бироқ, манбалардан бири таъкидлашича, федерал судлар томонидан қўриқланаётган энг муҳим гувоҳлар маълумотлари хавфсиз қолган — чунки улар Адлия вазирлигининг алоҳида тизимларида сақланади.

Бундан ташқари, хакерлар махфий айблов хулосалари, ҳибсга олиш ва тинтув ордерлари ҳамда жиноят ишларига оид бошқа ёпиқ материалларга ҳам кириш имконига эга бўлган бўлиши мумкин.

Бу бузилиш ҳақида июль ойи бошларида маълум бўлган. Politico маълумотига кўра, бу ҳақда 8-округдаги федерал судларнинг бош судьяларига хабар берилган. Бу округга Арканзас, Айова, Миннесота, Миссури, Небраска, Шимолий ва Жанубий Дакота штатлари киради.

Суд тизимида 20 йилдан зиёд ишлаган манбалардан бири бундай кўламдаги хакерлик ҳужуми билан илк марта тўқнаш келаётганини айтган. Яна бир манбага кўра, хакерлик натижасида айрим округларда ўнлаб суд иши ҳужжатлари сохталаштирилган. Бу маълумот ҳозирча мустақил манбалар томонидан тасдиқланмаган.

Ҳозирча АҚШ расмийларидан ҳеч қандай расмий баёнот берилмаган. Дастлабки тахминларга кўра, бу ҳужум ортида чет эл давлатлари билан боғлиқ хакерлар ёки жиноий гуруҳлар туриши мумкин.