АҚШ Эрондан уранни 20 йил давомида бойитишни тўхтатишни талаб қилмоқда

Вашингтон Теҳрондан уранни бойитишга 20 йиллик мораторий эълон қилишни сўрамоқда.

Бу ҳақда The Wall Street Journal нашри хабардор манбаларга таяниб хабар бермоқда.

АҚШ шунингдек, Эрондан барча мавжуд бойитилган ядровий материаллар захираларини олиб ташлашни талаб қилаётгани айтилган. Бундан ташқари, АҚШ маъмурияти Исфаҳон, Натанз ва Фордовдаги ядровий иншоотларни демонтаж қилишни, Эрон ядровий дастурининг бир қисми сифатида ер ости ишларига тақиқ қўйишни ва кенгайтирилган халқаро текшириш механизмини талаб қилмоқда.

CNN аввалроқ АҚШ ва Эрон уранни бойитишга ўн йилдан ортиқ муддатга мораторий эълон қилиш имкониятини муҳокама қилаётгани ҳақида хабар берган эди.

Axios маълумотларига кўра, Вашингтон ва Теҳрон қуролли можарога чек қўйиш бўйича бир саҳифали меморандум бўйича келишиб олишга яқин. Хабарларга кўра, АҚШ томони Эроннинг ўз таклифларига 48 соат ичида жавоб беришини кутмоқда.

Эрон Ташқи ишлар вазирлиги вакили Эсмаил Бағаей аввалроқ Теҳрон АҚШ таклифларини кўриб чиқишда давом этаётганини ва кейинчалик ўз жавобини Покистон томонига етказишини айтган эди.