АҚШ Эрон билан боғлиқ вазият кескинлашган тақдирда уриш учун янги ҳарбий нишонлар рўйхатини тузди

Вашингтон Эронга қарши операция бошлашга қарор қилган тақдирда зарба бериш учун мўлжалланган янги ҳарбий нишонлар рўйхати тайёрланди.

Бу ҳақда NBC News телеканали хабар бермоқда.

Манбаларга кўра, рўйхатдан яширин жойлашгани ва ҳимоя даражаси юқорилиги сабабли йўқ қилиш учун катта куч талаб этиладиган мураккаб объектлар ўрин олган.

Телеканалнинг таъкидлашича, ушбу рўйхатнинг шакллантирилиши АҚШ яқин орада зарба беришга ҳозирлик кўраётганини англатмайди. Ҳарбий ҳаракатларнинг бошланиши Доналд Трампнинг Теҳрон билан олиб борилаётган музокаралар юзасидан қабул қиладиган сиёсий қарорига боғлиқ.

Аввалроқ АҚШ президенти Эрон билан келажакдаги келишув лойиҳаси умумий ҳисобда келишиб олинганини маълум қилган эди. Кейинроқ Трамп томонлар ҳали айрим масалалар бўйича якуний келишувга эришмаганини қўшимча қилди.