АҚШ энди Япония ва Австралияга босим ўтказмоқда. Нега?

Пентагон Япония ва Австралияга босим ўтказмоқда, улардан АҚШ ва Хитой ўртасида Тайвань туфайли уруш чиқса, қандай роль ўйнашларини аниқ баён этишни талаб қилмоқда. Бу ҳақда Financial Times (FT) газетаси манбаларига таянган ҳолда хабар берди.

Нашр маълумотига кўра, сўнгги ойларда Пентагоннинг сиёсий масалалар бўйича раҳбари Элбридж Колби Япония ва Австралия мудофаа вазирликлари вакиллари билан учрашувларда ушбу масалани кўтарган. У АҚШнинг Индо-Тинч океани минтақасидаги иттифоқчиларини сўнгги пайтларда салоҳиятли урушга тайёргарлик кўриш ва Хитойга нисбатан тийиш чораларини кучайтиришга кўндиришга уринган.

Музокаралар давомида, шунингдек, АҚШ иттифоқчиларни мудофаа харажатларини оширишга чорлашга ҳам уриниб келаётгани айтилган.

«Бироқ Тайвань ороли учун урушда иштирок этиш мажбуриятини талаб қилиш — бу АҚШ томонидан қўйилган янги талабдир», — деб ёзади FT.

Манбаларнинг таъкидлашича, Вашингтоннинг бу талаби Токио ва Канберрани ҳайратда қолдирган, чунки АҚШнинг ўзи Тайванни тўлиқ ҳимоя қилишга кафолат бермаган.

2025 йил 11 июнь куни Пентагон раҳбари Пит Хегсет Хитой Тайванни куч билан ўзлаштириш ҳақида қарор қабул қилганига доир аниқ маълумотлар йўқлигини айтган эди.

Бундан аввал Хитой раҳбари Си Цзиньпин АҚШ президенти Дональд Трамп билан суҳбат чоғида Вашингтонни Тайвань масаласига нисбатан эҳтиёткорлик билан ёндашишга ва сепаратистларни Пекин билан тўқнашувга етаклашга йўл қўймасликка чақирган эди.