АҚШ БМТ Хавфсизлик Кенгашига Ғазо секторида халқаро хавфсизлик кучларини тузиш тўғрисидаги резолюция лойиҳасини тақдим этди

АҚШ БМТ Хавфсизлик Кенгашига Ғазо секторида халқаро хавфсизлик кучларини тузиш тўғрисидаги резолюция лойиҳасини тақдим этди — Ахios.

Ҳужжатга кўра, хорижий контингент 2027 йилгача минтақани назорат қилади, бу муддат кейинчалик узайтирилиши мумкин. Биринчи халқаро қўшинларни Ғазода жойлаштиришни 2026 йил январигача бошлаш режалаштирилган.

Халқаро кучлар ўтиш даврида Ғазо секторида хавфсизликни таъминлаши керак бўлади. Шу давр мобайнида Исроил ўз қўшинларини аста-секин минтақадан олиб чиқиши, Фаластин маъмурияти эса ислоҳотлар ўтказиши лозим.

Лойиҳага биноан, хорижий контингент Ғазо секторининг Исроил ва Миср билан чегараларини, тинч аҳолининг хавфсизлигини ҳамда гуманитар йўлакларни ҳимоя қилиш, шунингдек, фаластинлик полициячиларни тайёрлаш учун жавобгар бўлади.

Халқаро кучлар, шунингдек, “минтақадаги хавфсизлик бўйича вазиятини барқарорлаштириш” ва “Ғазо секторининг қуролсизланиш жараёнини таъминлаш” билан шуғулланиши керак бўлади. Бошқача айтганда, ҳарбийлар ҲАМАСни қуролсизлантириш жараёнини назорат қилади.