АҚШ Беларус авиакомпаниясига қарши қўлланилган санкцияни расман олиб ташлади

АҚШ Молия вазирлигининг Хорижий активларни назорат қилиш бошқармаси (OFAC) Беларуснинг "Белавиа" авиакомпаниясини санкциялар рўйхатидан расман олиб ташлади.

Бу ҳақда агентлик сайтида маълум қилинди.

Ҳужжатга кўра, рўйхатдан EW-301PJ давлат рақамига эга Bombardier Challenger 850 самолёти ҳам олиб ташланган.

Бундан ташқари, АҚШ Молия вазирлиги "Беларус президенти Александр Лукашенко ёки "Славкали" корхонаси билан боғлиқ" учта самолётга вақтинчалик лицензия берди. Ушбу ҳужжат самолётга техник хизмат кўрсатиш, парвозлар ва бошқа операцияларни бажаришга имкон беради.

11 сентябрь куни АҚШ президентининг матбуот котиби Жон Коул Вашингтон "Белавиа"га қарши 2022 йил апрелидан бери амалда бўлган санкцияларни бекор қилаётганини маълум қилди. Беларус авиакомпаниясига Минскка тегишли, назорат қилинадиган ёки АҚШда ишлаб чиқарилган самолётларда Беларус ёки Россияга парвоз қилиш тақиқланган.