АҚШ афғонистонликларга мамлакатга киришни тақиқлади

Оқ уй яқинидаги отишмадан сўнг АҚШ афғонистонликларга мамлакатга киришни тақиқлади ва барча учун бошпана беришни тўхтатди.

Оқ уй Иммиграция хизмати директори Жозеф Эдлоу бошпана бериш жараёни “ҳар бир чет эллик энг юқори даражада текширилиши кафолатланмагунча” тўхтатилишини маълум қилди.

Шу билан бирга, АҚШ давлат котиби Марко Рубио Афғонистон фуқароларига виза бериш тўхтатилганини эълон қилди.

Аввалроқ АҚШ Иммиграция хизмати “хавф даражаси юқори давлатлардан” келган барча хорижий фуқароларнинг Грин-карталарини синчковлик билан текшириш бошланганини билдирган эди. Бу рўйхатда Афғонистондан ташқари, яна 18 мамлакат, жумладан, Эрон, Ливия, Сомали, Куба ва Венесуэла бор.

Бундан ташқари, президент Доналд Трамп Қўшма Штатларга “учинчи дунё мамлакатлари”дан бўлган мигрантларнинг кириб келишини тўлиқ тўхтатишга ваъда берганди.

26 ноябр куни Оқ уй яқинида юз берган отишма натижасида АҚШ Миллий гвардиясининг 2 нафар ҳарбийси оғир яраланган, кейинроқ улардан бири вафот этганди. Отишмада гумонланиб, 2021 йилда Афғонистондан АҚШга кўчиб келган 29 ёшли Раҳмонулла Лаканвал қўлга олинган.