Андижон вилоятида тадбиркорнинг 214,5 млн сўмлик маиший техникаларини ўзлаштирган бош мутахассис аниқланди

Бош прокуратура ҳузуридаги Департаментнинг Жалақудуқ тумани бўлими томонидан тадбиркорлик субъектларининг ҳуқуқларини ҳимоя қилиш юзасдан ўтказилган терговга қадар текширувда “G.V.” МЧЖга қарашли омбор бош мутахассиси Ш.А. “I.S.” дастурида буюртма орқали сотиб олинган 214,5 млн сўмлик турли маиший техника маҳсулотларини бошқа шахсларга сотиб, гўёки ушбу буюртмалар бекор қилинганлиги ҳақида дастурга қайдлар киритиб, сотишдан тушган пулларни ўзлаштириб юборганлиги аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.