Америкалик конгрессменлар Трампга мактуб йўллади

Америкалик конгрессменлар Трампни Марказий Осиё давлатлари иштирокида саммит ўтказишга чақирди.

АҚШ Конгресси аъзолари Сидни Камлагер-Дав ва Билл Ҳюизенга президент Доналд Трампга дипломатик форум ташкил этилганининг 10 йиллиги муносабати билан Вашингтонда “Марказий Осиё - АҚШ” (C5+1) етакчилари саммитини ўтказишга чақирувчи мактуб йўллади. Бу ҳақда конгрессвумен Камлагер-Дав расмий сайтида хабар берди.

"Президент Трампнинг C5+1 саммитидаги шахсий иштироки форумнинг 10 йиллигини муҳим дипломатик лаҳзага айлантириши ва АҚШ-Марказий Осиё муносабатларининг кейинги ўн йилликдаги йўналишини белгилаб бериши мумкин", дейилади мактубда.

“Марказий Осиё - АҚШ” (C5+1) формати АҚШ ва Марказий Осиёнинг бешта давлати ўртасидаги мулоқот ва биргаликдаги саъй-ҳаракатлар учун платформа ҳисобланади. C5+1 2015 йил ноябр ойида Самарқандда бўлиб ўтган ташқи ишлар вазирларининг биринчи учрашувидан сўнг ташкил этилган ва 2023 йил сентябр ойида бўлиб ўтган президентлар учрашувига қадар ташқи ишлар вазирлари даражасида ўтказилган.