Ал-Ақсо масжиди таҳқирланди: Эрон мусулмон давлатларини кескин муносабат билдиришга чақирди

Эрон Ташқи ишлар вазирлиги вакили Носир Каноний икки ўта ўнг қанотчи исроиллик вазир ва бир оломон кўчманчилар томонидан Ал-Ақсо масжидининг таҳқирланишини кескин қоралаб, бу иғвогар ҳаракат сионистик режим Ғарбий Осиёда кескинликни кучайтиришга интилаётганини кўрсатишини таъкидлади.

Сешанба куни Х'да ёзган Каноний, баъзи исроиллик вазирлар ва сионист кўчманчиларнинг Ал-Ақсо масжидига бостириб кириши «мусулмонларнинг муқаддас жойларини очиқдан-очиқ таҳқирлаш, бутун дунёдаги мусулмонлар ҳуқуқларини поймол қилиш, ҳамда минтақада беқарорлик, кескинлик ва ишончсизликни қўзғатишга мўлжалланган провокацион қадам» деди.

Бош дипломат адолатсиз ва зиддиятли ҳаракатни қоралаб, халқаро ҳамжамиятни, хусусан, мусулмон давлатлар ва ҳукуматларни бунга жавобан кескин муносабат билдиришга чақирди.

«Халқаро ҳамжамият ва дунё тузилмалари сионистик режимнинг халқаро қонун ва қоидаларга зид бўлган ваҳший ҳаракатларини тўхтатиш учун холис ва зудлик билан масъулдир», - дея қўшимча қилди у.

Ўта ўнгчи миллий хавфсизлик вазири Итамар Бен-Гвир сешанба куни босиб олинган Шарқий Қуддусдаги Ал-Ақсо масжидига минглаб оломонни бошлаб келди.

Хабар қилинишича, бу ваҳший ҳаракатга бошқа депутатлар ҳам қўшилган.

У ерда яҳудийларнинг диний маросимлари тақиқланганига қарамай, Исроил полицияси Ғарбий Соҳилдаги зўравонликларда иштирок этган ноқонуний кўчманчиларни ҳимоя қилган. Исроил полицияси, шунингдек, масжидга киришга уринаётган мусулмон намозхонларга «чекловлар киритди».

Ал-Ақсо Исломнинг учинчи муқаддас жойи ва Фаластин миллий ўзига хослигининг рамзидир.