Air Astana авиакомпаниясига тегишли самолёт двигателининг ишдан чиқиши туфайли фавқулодда қўнишни амалга оширди

Остонадан Франкфуртга йўл олган Air Astana рейси Актобеда фавқулодда қўнди.

Бу ҳақда Қозоғистон оммавий ахборот воситалари хабар бермоқда.

Остона аэропортидан учиб чиққандан сўнг, экипаж двигателнинг ишдан чиқиши сабабли фавқулодда сигнал берди. Экипаж қўниш учун Актобедаги муқобил аэродромга йўналишни ўзгартиришга қарор қилди.

Самолёт бортида 93 йўловчи, жумладан, тўртта бола ва битта гўдак, шунингдек, тўққизта экипаж аъзоси бўлган.

Қўнгандан сўнг, самолёт перронга йўл олди. Хавфсизликни таъминлаш учун аэропорт фавқулодда хизматлари ва ер усти экипажлари сафарбар қилинди.