Африкада Эбола вирусини юқтирганлар 30 кун ичида Европа ва Осиёнинг йирик аэропортларига етиб бориши мумкин

Япониялик олимлар томонидан ўтказилган математик моделлаштириш натижаларига кўра, Африкада Эбола вирусини юқтирган шахслар 30 кун ичида юқори эҳтимол билан Европа ва Осиёнинг йирик транзит аэропортларига етиб боради.

Тадқиқот Конго Демократик Республикаси ва Угандадан вирус ташувчилари фойдаланиши мумкин бўлган авиация йўналишлари таҳлилига асосланган. Олимлар фикрича, бир ой ичида вирус юқтирган шахслар Белгия, Франция, Бирлашган Араб Амирликлари ва Туркия каби йирик халқаро транспорт марказларига етиб бориши эҳтимоли мавжуд.

Ҳисоб-китобларга кўра, энг салбий сценарийда Белгияда вирус юқтирган йўловчининг аниқланиш эҳтимоли 92 фоизни, Францияда 91 фоизни, БААда 88 фоизни, Туркияда эса 86 фоизни ташкил этади.

Япониялик олимлар ўз моделига 11 264 та аэропорт, 569 741 та авиайўналиш ва тахминан 330 миллион йўловчи ҳақидаги маълумотларни киритган. Тадқиқотда таъкидланишича, мазкур дастлабки прогнозлар халқаро вазиятни тезкор кузатиш учун асос яратади, бироқ вирус юқтирган шахснинг мамлакатга кириб келиши инфекция кейинчалик тарқалишини англатмайди.

Май ойининг ўрталарида Конго Демократик Республикаси ва Угандада Эболанинг бундибугё штамми тарқала бошлаган эди. Жаҳон соғлиқни сақлаш ташкилоти зудлик билан буни “бошқа давлатларга хавф солувчи фавқулодда ҳолат” деб эълон қилди. Шунингдек, ташкилот вируснинг минтақа бўйлаб тарқалиш хавфини юқори деб баҳолади. Сўнгги маълумотларга кўра, Конго Демократик Республикасида вирус юқтирганлар сони 800 нафардан ошган, камида 192 киши эса вафот этган.