Танзания шимолидаги Климанжаро провинциясини чигирткалар босди. “Анадолу” агентлигининг хабар беришича, Кениядан келган чигирткалар далалар ва экинларга зарар бера бошлаган.
Зараркунандаларга қарши курашиш учун ҳудудга дарҳол иккита махсус самолёт ва қишлоқ хўжалиги мутахассислари юборилди.
Кения, Эфиопия, Судан сингари бир қатор Шарқий Африка мамлакатлари охирги йилларда чигирткалар истилосидан талафот кўряпти. БМТ Озиқ-овқат ва қишлоқ хўжалиги ташкилоти маълумотига кўра, минтақада чигирткаларга қарши курашиш учун 38 миллион доллар маблағ зарур. Ташкилот яқинда янги чигиртка галалари Эфиопия, Кения ва Сомалида тарқала бошлагани, улар Жанубий Судан, Танзания ва Угандага ҳам етиб бориши мумкинлигидан огоҳлантирган эди.
Бир километр квадрат майдонни эгаллаган 40-80 миллион атрофидаги чигиртка бир кунда 35 минг кишига етадиган озиқни еб қўйиши мумкин.
