Афғонистонда содир бўлган йирик ЙТҲда ҳалок бўлганлар сони 80 нафарга яқинлашди

Афғонистоннинг Ҳирот вилоятида автобус мотоцикл ва ёнилғи ташувчи танкер билан тўқнашиб кетиши оқибатида ҳалок бўлганлар сони 79 кишига етди.

Бу ҳақда Афғонистон ИИВ матбуот котиби Абдул Матин Кани маълум қилди.

Таъкидланишича, ҳалок бўлганлар орасида 19 нафар бола бор, яна икки киши жароҳатланган.

Tolo News агентлиги айни мулозимга таяниб, воқеа 19 август куни кечқурун Ғузора туманида содир бўлганини аниқлайди. Уч карра тўқнашув натижасида катта ёнғин бошланган ва кўпчилик воқеа жойида ҳалок бўлган. Гувоҳнинг AFPга айтишича, автобусдан фақат уч киши қутқарилган; олов шунчалик кучли эдики, яқинлашиб бўлмайди. Маҳаллий ҳарбий госпиталь бош шифокорининг журналистларга айтишича, жасадларнинг кўпчилиги шунчалик куйганки, уларни таниб бўлмайди.

Аввалроқ ЙТҲ оқибатида 71 киши ҳалок бўлгани хабар қилинганди.