Афғонистонда ота 4 ёшли қизини 590 долларга сотди

Aфғонистонда яшовчи собиқ полициячи Мир Нозир 7 нафардан иборат оиласини очликдан қутқариш учун 4 ёшли қизини 590 долларга сотишга мажбур бўлди.

Мир Нозир бу ҳақида "Times" газетасига берган интервьюсида айтиб ўтган.

Унинг сўзларига кўра, фарзандсизликдан қийналган бир дўкон эгаси унга 20 минг афғон пули (тахминан 236 доллар) эвазига қизи Сафияни сотиб олишни ва ўзига дўконида ишлашни таклиф қилган. Бироқ Нозир болани бунчалик арзон нархда сотишга рози бўлмаган.

Натижада, дўкондор 4 ёшли Сафия учун 50 минг афғон пули (тахминан 590 доллар) тўлашни таклиф қилган.