Афғонистонда интернет тўлиқ ўчирилди

Афғонистон бўйлаб интернет хизмати бутунлай узилиб қолган.

NetBlocks халқаро интернет-мониторинг хизмати бу ҳақда ўзининг Telegram-каналида маълум қилди.

"Афғонистон ҳозирда интернет тўлиқ ўчирилган ҳолатда, чунки Толибон ҳукумати ахлоқни сақлаш чораларини кўрмоқда" - дейилади ҳисоботда.

Нашр айни пайтда телефон алоқаси узилиб қолганини ҳам қайд этади.

Аввалроқ Афғонистон ОАВлари Афғонистон Ислом Амирлиги олий раҳбари Ҳайбатуллоҳ Охундзода "ахлоқсиз хатти-ҳаракатларнинг олдини олиш" учун бир қанча ҳудудларда симли интернетни тақиқлашни буюргани ҳақида хабар берган эди. Расмийларнинг айтишича, бу қарор давлат хизматлари ишига тўсқинлик қилган.