Абдуқодир Ҳусановга Россия клублари жиддий қизиқиш билдиргани маълум бўлди

Абдуқодир Ҳусановнинг агенти Ғайрат Ҳасбиуллин "Манчестер Сити" ҳимоячиси ва Ўзбекистон миллий терма жамоаси аъзосига "Ланс"га ўтишидан аввал қайси Россия клублари қизиққани ҳақида гапириб берди.

— Баҳорда Юрий Сёмин билан суҳбатлашганимда, у собиқ СССР ҳудудидан етишиб чиққан бундай иқтидорни россиялик скаутлар қандай қилиб пайқамай қолганидан ҳайратда эди.

— Улар пайқашган, шунчаки Қодирнинг ўзи Россия Премьер-лигасини танламаган. "Сочи"дан ташқари — бу ҳақда аниқ биламан — уни яна "Алания" ҳам истаган, ўша пайтдаги спорт директори Тимур Демуров уни олиб келмоқчи бўлган. У ўзбекистонлик кўплаб футболчиларни топган.

— Аммо улар Ҳусановни у минскнинг "Энергетик-БГУ" клубида ўйнаётган пайтда исташган. Ўзбекистонда эмас.

— У пайтда уни ҳеч ким билмасди. У 17 ёшида Беларусга кетган, ҳатто "Бунёдкор"нинг ўринбосарлар таркибида ҳам ўйнамаганди. У бошидан Европани орзу қилган.

Менимча, агар ўша пайтда бирор Россия клуби уни истаганда ҳам, Қодир йўқ деб жавоб берарди. Ўзбекистонлик ёш ўйинчилар ҳозир Россия чемпионатига интилмаяпти — бунга изоляция ҳам сабаб бўлмоқда. Юксак мақсадларни кўзлаганлар дарҳол Европага кетишга ҳаракат қилади, – деди Ғайрат Ҳасбиуллин.