500 фоизлик бож: Жиддий ўзгаришлар бўлиши мумкин

Россия энергетикасини харид қилаётган мамлакатларга қарши 500 фоизлик бож жорий этиш ҳақидаги янги қонун лойиҳаси Конгресс томонидан кўриб чиқилаётган вақтда жиддий ўзгаришларга юз тутиши мумкин — Politico.

Politico нашри экспертларга таяниб хабар беришича, АҚШ сенатори Линдси Грэм томонидан таклиф этилган Россияга қарши санкциялар жорий этиш тўғрисидаги қонун лойиҳаси Конгрессдаги муҳокамалар чоғида жиддий ўзгаришларга учраши эҳтимоли юқори. Нашрнинг ёзишича, мазкур ҳужжат юзасидан муҳокамалар анча вақт олиши мумкин.

“Грэмнинг лойиҳасида назарда тутилган айрим чекловлар жуда зиддиятли саналади. Хусусан, унда келтирилган Россиядан энергия манбаларини харид қилаётган мамлакатга 500 фоизлик бож тўлови жорий этиш таклифи қабул қилинса, АҚШ ўзининг энг яқин ҳамкори ҳисобланган Европа давлатлари каби йирик иқтисодий кучлардан айрилиши мумкин”, деб ёзади нашр.

Гарчи сенатор Грэм Киевга ёрдам бераётган мамлакатлар учун истисно кўзда тутиш таклифини билдирган бўлса-да, экспертлар бу каби юқори божлар амалга ошишига шубҳа билан қарамоқда.

Мақолада таъкидланишича, АҚШ ҳанузгача атом электр станцияларини ёқиш учун Россиядан бойитилган уран импорт қилиб келади, бу эса унинг ўзи ҳам ушбу қонунга амал қилолмаслигини билдиради.

"Россия нефтининг асосий харидорлари ҳамон Хитой ва Ҳиндистон бўлиб қолмоқда. Агар, масалан, Хитойда ишлаб чиқарилган маҳсулотларга 500 фоизлик бож жорий этилгудек бўлса, бу алал-оқибат мамлакатда нархларнинг кескин ошиб кетишига, етказиб бериш занжирларининг узилишига ва ҳатто ишсизлик даражасининг кўтарилишига олиб келиши мумкин. Бу қарор АҚШ билан Хитой ўртасидаги савдо-иқтисодий алоқаларнинг кескин тўхташига сабаб бўлиб, америкаликларнинг ўзига жиддий зарар етказади", дейилади мақолада.

Аввалроқ Доналд Трамп ушбу қонун лойиҳаси юзасидан ҳали қарор қабул қилмаганини ва уни сенаторлар билан муҳокама қилмаганини айтган эди.