Маълумки, дунёнинг қатор мамлакатларида 5 июнь – Бутунжаҳон атроф- муҳит кунига бағишлаб турли хил тадбирлар, жумладан, “яшил” концертлар, кўрик-танловлар, боғлар яратиш, шунингдек, атроф-муҳитни тозалашга қаратилган турли экологик акциялар ўтказилади. Кейинги йилларда бу анъана бизнинг юртимизда ҳам кенг давом этиб келмоқда. Бундан кўзланган мақсад, ҳамжамият эътиборини атроф муҳитни муҳофаза қилиш муаммоларига ҳамда глобал экологик инқирознинг олдини олиш бўйича аниқ чора-тадбирлар ишлаб чиқишга қаратишдир.
Бугун Тошкент вилояти, Оққўрғон тумани Алимкент қўрғони, “Гулистон” МФЙ даги Ихтисослаштирилган Президент мактабида бўлиб ўтган тадбир ана шу санага бағишланди. Унда Олий Мажлис Қонунчилик палатаси депутати, Ўзбекистон Экологик партияси Тошкент вилояти партия ташкилоти, Экология, атроф-муҳитни муҳофаза қилиш ва иқлим ўзгариши вазирлиги Тошкент вилояти бошқармаси, Нодавлат нотижорат ташкилотлари, маҳаллий Кенгаш депутутлари, туман, шаҳар партия ташкилоти Кенгаши раислари ҳамда партия аъзолари ҳамда партия фаоллари иштирок этишди.
Тадбирда сўзга чиққанлар атроф-муҳитни муҳофаза қилишда Ўзбекистон Экологик партиясининг тутган ўрни ва унинг асосий вазифалари хусусида кенг тўхталиб ўтдилар. Жумладан, Ўзбекистон Экологик партияси Тошкент вилояти партия ташкилоти Кенгаши раиси Фурқатжон Аҳмеджанов ўз сўзида аҳоли сонининг ошиб бориши, саноат ва транспортнинг ривожланиши, фан-техниканинг тараққий этиши, инсоннинг биосферага кўрсатаётган таъсири кенгайтириб бораётганлигини, бу эса ўз навбатида экологик муаммоларга сабаб бўлаётганлигини алоҳида таъкидлаб ўтди. Шунингдек, тадбирда фаол иштирок этган мактаб ўқувчилари экологияни асраш борасидаги ўзларининг лойиҳаларини намойиш этишди.
Тадбир сўнгида атроф-муҳитни муҳофаза қилиш ва экологик мувозанатни сақлашда ўзларининг муносиб ҳиссаларини қўшиб келаётган маҳалла фаоллари, эковолонтёрларга ташаккурнома ҳамда сертификатлар топширилди.
Гулруҳ Ёрматова, журналист
