Uzbekistan Airways янги келтириладиган A321neo самолётларини юқори тезликдаги интернет билан таъминловчи HBCplus борт алоқаси тизими билан жиҳозлайди.
HBCplus — сунъий йўлдош орқали мултиорбитал алоқани қўллаб-қувватловчи илғор технология бўлиб, йўловчиларга парвоз вақтида филмлар кўриш, ижтимоий тармоқлардан фойдаланиш, мессенжерлар орқали хабар алмашиш ва онлайн ишлаш имконини беради. Бу авиакомпаниянинг борт хизматини рақамлаштириш ва йўловчиларга қулайлик яратиш стратегиясининг бир қисми ҳисобланади.
Янги тизимни ўрнатиш 2026 йилдан бошланади. Ушбу йилда биринчи A321neo самолётлари Uzbekistan Airways паркига қўшилиши режалаштирилган.
Маълумот учун миллий авиаташувчи бўлган Uzbekistan Airways’нинг парвозларида ҳозирда Boeing 767/787, Airbus А-320/321, L-410 ва ATR-72 турдаги самолётлар қатнамоқда.
