Эстония Болтиқ денгизи орқали ўтиш учун солиқ жорий қилмоқчи

Эстония мудофаа вазири Ханно Певкур Болтиқ денгизидаги сувости кабелларини ҳимоя қилиш бўйича бир қатор чоралар муҳокама қилинаётганини маълум қилди. Унинг таъкидлашича, бу қиммат лойиҳага айланади ва натижада истеъмолчилар солиқ ёки коммунал тўловларнинг ошиши орқали қўшимча харажатларни қоплаши мумкин. Шу билан бирга, альтернатив чоралар сифатида Болтиқ денгизи орқали ўтувчи кемалардан тўлов олиш таклиф этилмоқда.

«Эҳтимол, келажакда Дания бўғозларидан (Болтиқ денгизини жаҳон океани билан боғловчи асосий денгиз йўли) ўтишда компаниялар тўлов тўлашига тўғри келади. Чунки бу, аслида, кабелларга етказилиши мумкин бўлган зарарларга қарши суғурта тўловидир», — деди Певкур Реутерс агентлигига берган интервьюсида.

Певкурнинг айтишича, акваторияни патруль қилиш билан бир қаторда қўшимча хавфсизлик чоралари ҳам кўриб чиқилмоқда. Уларга «сувости кабелларини ҳимоя қилиш учун махсус деворлар қуриш» ва «анкараларни аниқлаш учун датчиклар ўрнатиш» киради.

Халқаро кабель ҳимояси қўмитаси маълумотларига кўра, ҳар йили дунёда 150 га яқин сувости кабели шикастланади. Болтиқ денгизида ётқизилган кабеллар айниқса хавф остида, чунки бу ҳудудда жуда интенсив ҳаракат мавжуд — турли манбаларга кўра, ҳар куни денгиздан 4 мингга яқин кема ўтади.