Avvalroq, Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgan edik.
Oliy sud matbuot xizmatining ma’lum qilishicha, ayblanuvchilarga nisbatan jinoyat ishi Toshkent shahar sudida ko‘rib chiqiladi.
Xabarga ko‘ra, Oliy sud jinoyat ishlari bo‘yicha sudlov hay’ati kassasiya instansiyasining 6 apreldagi ajrimi bilan Xorazm viloyat sudi jinoyat ishlari bo‘yicha sudlov hay’ati appelyasiya instansiyasining 2022 yil 27 dekabrdagi ajrimining A.M. va A.Q.ga oid qismini bekor qilgan. Ishni yangidan appelyasiya instansiyasi sudida ko‘rish uchun yuborish to‘g‘risidagi Xorazm viloyat prokuraturasining kassasiya tartibidagi protesti qanoatlantirilgan. Ushbu jinoyat ishi yangidan appelyasiya instansiya sudida ko‘rish uchun yuborilishi belgilangan.
Jinoyat-prosessual kodeksining 393-moddasiga (jinoyat ishining sudlovga tegishliligiga ko‘ra o‘tkazilishi) asosan ushbu jinoyat ishi appelyasiya tartibida yangidan ko‘rib chiqish uchun Toshkent shahar sudiga yuborilgani ma’lum qilindi.
Qayd etilishicha, Jinoyat-prosessual kodeksining 19-moddasi (sudda jinoyat ishlarining oshkora ko‘rilishi) talablariga muvofiq, mazkur jinoyat ishi yopiq sud majlisida ko‘rib chiqilib, qo‘shimcha ma’lumot sud jarayoni yakuni bo‘yicha beriladi.
