Xitoy Rossiya-Ukraina mojarosida qatnashayotgan tomonlarga qurollar yetkazib bermaydi

Xitoy Rossiya-Ukraina mojarosida qatnashayotgan tomonlarga halokatli qurollar yetkazib bermayapti va ikki maqsadli mahsulotlar eksportini qattiq nazorat qiladi.

Bu haqda Berlinda Xitoy tashqi ishlar vaziri Van I germaniyalik hamkasbi Yogan Vadeful bilan bo‘lib o‘tgan qo‘shma matbuot anjumanida ma’lum qildi.

"Men vazir Vadeful bilan Ukraina inqirozi va boshqa dolzarb masalalarni muhokama qildim. Xitoyning pozisiyasi juda aniq: biz tinchlik va muzokaralarga erishish uchun sa’y-harakatlarni amalga oshirmoqdamiz. Biz mojaro tomonlariga o‘limga olib keladigan qurol-yarog‘larni yetkazib bermaymiz, biz ikki maqsadli mahsulotlar, jumladan, uchuvchisiz samolyotlar eksportini juda qattiq nazorat qilamiz", - dedi u.

Van I Xitoy rahbari Si Szinpinning “murakkab muammolarga oddiy yechim yo‘q” degan so‘zlarini esladi. “Biz keng qamrovli, uzoq muddatli va majburiy tinchlik kelishuviga erishish, Yevropada muvozanatli, samarali va barqaror xavfsizlik arxitekturasini barpo etish hamda Yevropada uzoq muddatli tinchlikni tiklashda turli tomonlarning faol rolini olqishlaymiz”, — dedi Van I. "Dunyodagi vaziyat qanchalik notinch bo‘lsa, biz hamkorlikka shunchalik tayanishimiz kerak", deb hisoblaydi u.