Ukraina urushi xaritasi Rossiyaning uch frontda chekinayotganini ko‘rsatmoqda

Xabarlarga ko‘ra, Ukraina qo‘shinlari frontning uch qismida ilgarilamoqda, Rossiya qo‘shinlari esa ishchi kuchi yetishmovchiligi va yomon qo‘mondonlikka duch kelmoqda.

Moskvaparast harbiy blogerlardan biri xaritada ko‘rsatilgan so‘nggi vaziyatga ko‘ra, Ukraina kuchlari Donetsk viloyatidagi rus qo‘shinlariga tobora kuchli bosim o‘tkazayotganidan afsuslanmoqda.

Bu Ukraina kuchlarining Toretsk va Pokrovsk yaqinidagi so‘nggi yutuqlari hamda Qo‘shma Shtatlarning Kiyevga harbiy yordam ko‘rsatishni davom ettirishiga oid xavotirlar fonida sodir bo‘lmoqda.

Ukraina yutuqlari haqidagi xabarlar shuni ko‘rsatadiki, Kiyev kuchlari AQShning Rossiyaga qarshi kurashni qo‘llab-quvvatlashi susayishi to‘g‘risidagi munozaralarning jang maydoniga tezkor ta’sir ko‘rsatishiga yo‘l qo‘ymagan.

Donetsk viloyatidagi shiddatli janglar Tramp ma’muriyati yordamni to‘xtatishi bir necha oy ichida Ukrainaning Rossiyaga qarshi kurashish qobiliyatiga zarar yetkazishi mumkinligi haqidagi ogohlantirishlar ostida davom etmoqda.

Rus manbalaridan jang maydonlari haqidagi ma’lumotlarni ulashuvchi "War is Translated" nomli X hisobi Pokrovsk yaqinida Moskva qo‘shinlari duch kelayotgan vaziyat haqida Moskva tarafdori bo‘lgan harbiy bloggerning "halokatli" postini ta’kidlab o‘tdi.

Telegramdagi postda Rossiya qo‘shinlarining ahvoli ishchi kuchi yetishmasligi tufayli "o‘ta og‘ir" deb ta’riflangan.

Chasiv Yar shahri yaqinida ozgina ilgarilanish kuzatilgan bo‘lsa-da, Ukrainaning ta’minot yo‘llariga bergan zarbalari rivojlanishga to‘sqinlik qilmoqda, Toretsk shahrida esa shahar janglari davom etmoqda, deyiladi postda.

Shuningdek, unda Ukraina dronlar kabi havo vositalari bilan past parvoz hududida ustunlik qilayotgani va rus askarlari bilan "krepostnoylar kabi muomala qilinayotgani" haqida yozilgan, bu esa urush davomida Moskva qo‘shinlari orasidagi past ruhiy holatni aks ettiruvchi xabarlarga mos keladi.

Kichik va o‘rta darajadagi rus qo‘mondonlari, chamasi, natija ko‘rsatish uchun yuqori rahbarlarning doimiy bosimi ostida bo‘lib, o‘z askarlarining shikoyatlariga quloq solmay qo‘yishgan.

Urushni o‘rganish instituti (ISW) tahlil markazi chorshanba kungi hisobotida Ukraina qo‘shinlari Pokrovsk janubida va Toretsk janubi-g‘arbida ilgarilaganini ma’lum qildi. Shuningdek, Chasiv Yar yo‘nalishidagi noqulay ob-havo sharoiti ukrainalik dron operatorlarining Rossiya kuchlarini aniqlash imkoniyatini cheklab qo‘yganini ta’kidladi.