Ukraina Isroilni ham, Falastinni ham tan oladi

Ukraina xalqaro huquq va BMT Nizomini hurmat qiladigan adolatli davlat va ikki davlatni - Isroil va Falastinni tan oladi.

Censor.NET xabar berishicha, bu haqda Ukraina prezidenti Vladimir Zelenskiy Singapurda bo‘lib o‘tgan “Dialog – Shangri La” konferensiyasida ma’lum qilgan.

Vladimir Zelenskiyning so‘zlariga ko‘ra, Ukraina bu mojaroga barham berish va tinch aholi azob chekmasligi uchun kerakli barcha ishni qiladi.

“Ukraina, agar Xamas terrorchilari tinch aholiga hujum qilsa, Isroil o‘zini himoya qilishga haqli ekanini aytdi... Shundan so‘ng Isroil G‘azoda bo‘lib, gumanitar inqiroz yuzaga kelganida Ukraina: birinchidan, G‘azoga gumanitar yordam berishga tayyor; ikkinchidan, biz xalqaro huquqni hurmat qilishimiz kerak; uchinchidan, Ukraina ikki davlatni, Isroil va Falastinni tan oladi”, dedi prezident.

Eslatib o‘tamiz, 22-may, chorshanba kuni Norvegiya, Irlandiya va Ispaniya hukumatlari Falastinni davlat sifatida rasman tan olganini e’lon qilgan edi. Bunga javoban Isroil bu davlatlardan o‘z elchilarini chaqirib olishini ma’lum qildi.