Ukraina Yevropa Kengashida maxsus tribunal yaratish jarayonini boshladi

Kiyevning rasmiy vakillari Yevropa Kengashi Vazirlar qo‘mitasi yig‘ilishida Vladimir Zelenskiyning Ukrainaga qarshi bosqinchilik jinoyati bo‘yicha Maxsus tribunal tuzish haqidagi iltimosi bilan xatini topshirdi.

Murojaat Yevropa Kengashi Bosh kotibi Alen Berset va Lyuksemburg tashqi ishlar vaziri Xaver Bettel tomonidan qabul qilingan. Endi Lyuksemburgda yig‘ilgan Yevropa Kengashi vazirlar qo‘mitasi maxsus tribunal yaratish jarayonini rasman boshlashi kerak, deb xabar beradi DW muxbiri.

Avvalroq ma’lum bo‘lishicha, 40 ga yaqin davlat, Yevrokomissiya, YEI tashqi ishlar xizmati va Yevropa Kengashidan iborat maxsus tribunal tashkil etish bo‘yicha asosiy guruh ushbu xalqaro sudni yaratish bo‘yicha texnik loyiha ustida ishlashni yakunlagan. Loyiha uchta asosiy hujjatdan iborat: Ukraina va Yevropa Kengashi o‘rtasida tribunalni shakllantirish to‘g‘risidagi ikki tomonlama kelishuv matni, uning nizomi va rasmiy ravishda “kengaytirilgan qisman kelishuv” deb ataladigan tribunalni boshqarish bo‘yicha kelishuv.

Ba’zi davlatlar Yevropa Kengashiga a’zoligi asosida uni avtomatik ravishda imzolashi mumkin, boshqalari esa uni milliy parlamentlarida ratifikasiya qilishi kerak, bu vaqt talab qilishi mumkin. Shu bilan birga, Yevropa Ittifoqi rasmiylari Yevropa Kengashi bilan bog‘liq rasmiy prosedura bir necha hafta ichida yakunlanishi mumkinligini istisno qilmayapti.