Uchtepada “plandan oshib ketgan” ko‘p qavatli uy qurilishi to‘xtatildi

Toshkentning Uchtepa tumanida “Great Vertex” kompaniyasi tomonidan qurilayotgan ko‘p qavatli uy faoliyati to‘xtatildi. Bunga loyiha hujjatlariga zid ravishda qavatlar soni oshirilgani sabab bo‘lgan.

Qurilish avtoturargoh o‘rnida amalga oshirilayotgan bo‘lib, bu yerda zamonaviy turar joy va avtoturargoh barpo etilishi kerak edi. Ammo 2025 yil 28 fevralda qavatlarni ko‘paytirish bo‘yicha berilgan ariza rad etilganiga qaramay, ishlar davom etgan.

Qurilish sohasidagi inspeksiya 13 marta tekshiruv o‘tkazib, qonunbuzarlikni tasdiqladi. Mas’ul shaxsga nisbatan ma’muriy bayonnoma tuzilgan.

Hozirda qurilish to‘liq to‘xtatilgan. Kamchiliklar bartaraf etilmaguncha, ob’ektda ishlar qayta boshlanmaydi.