Transporter-12 missiyasi doirasida SpaceX kompaniyasining Falcon 9 raketasi turk kompaniyasining birinchi sun’iy yo‘ldoshi Fergani Space FGN-100-d1 ni orbitaga muvaffaqiyatli olib chiqdi.
Uchirish AQShdagi Vandenberg havo kuchlari bazasida bo‘lib o‘tdi va SpaceX akkauntlarida jonli efirda namoyish etildi.
Transporter-12 missiyasi davomida Falcon 9 raketasi koinotga 131 ta foydali yukni olib chiqdi. Ular orasida kubosatlar, mikrosatellitlar va orbital transport vositalari mavjud. FGN-100-d1 sun’iy yo‘ldoshidan tashqari kosmik texnologiyalarni faol rivojlantirayotgan yana bir turk kompaniyasi Plan-S sun’iy yo‘ldoshlari ham orbitaga chiqardi.
Fergani Space sun’iy yo‘ldoshi uchun vodorod peroksid asosidagi kosmik dvigatelning sinovlari o‘tgan yilning may oyida muvaffaqiyatli yakunlandi va bu missiyaga tayyorgarlikning muhim bosqichlaridan biri bo‘ldi.
Fergani Space asoschisi, Baykar boshqaruv kengashi raisi Selchuk, Bayraktar Turkiyaning birinchi sun’iy yo‘ldoshini orbitaga muvaffaqiyatli chiqarganini aytdi.
“2022 yilda ishga tushirgan Fergani Space korxonasi 106 kishilik katta oila sifatida rivojlanishda davom etmoqda. Bugun biz birinchi turk sun’iy yo‘ldoshini orbitaga chiqardik. Bizning sun’iy yo‘ldoshlarimiz joylashishni aniqlash va aloqa maqsadlarida past orbitali yulduz turkumi bo‘lib xizmat qiladi. Biz bu loyihani o‘z kuchimiz bilan amalga oshirdik. Ayni vaqtda sun’iy yo‘ldoshimiz kerakli balandlikka yetdi va birinchi manevrlarini yakunladi”, – dedi Selchuk Bayraktar.
Mutaxassislarning ta’kidlashicha, FGN-100-d1 sun’iy yo‘ldoshi “Fergani Space”ning kosmik texnologiyalar va navigasiya tizimlarini rivojlantirish bo‘yicha global missiyasining birinchi bosqichi bo‘ldi. Ushbu kosmik loyihaning muvaffaqiyatli amalga oshirilishi Turkiyaning koinotni o‘rganishdagi roli ortib borayotganini va milliy sun’iy yo‘ldosh infratuzilmasini yaratishga intilishini ko‘rsatadi.
