Turkiya tabiiy gaz importini qisqartirdi

So‘nggi vaqtlarda Turkiyaga gaz yetkazib berish hajmi yillik hisobda 21,7 foizga kamaydi, deb xabar beradi Daily Sabah.

Turkiyaning Energiya bozorini tartibga solish boshqarmasi (EPDK) ma’lumotlariga ko‘ra, iyul oyida tabiiy gaz importi qariyb 3,06 milliard kub metrni tashkil etdi. Bu o‘tgan yilning shu oyidagi ko‘rsatkichdan 21,7 foizga kam. Shundan quvur orqali yetkazib berilgan gaz hajmi 2,87 milliard kub metrni, suyultirilgan tabiiy gaz hajmi esa 194,05 million kub metrni tashkil etdi.

Quvur orqali gaz yetkazib berishda eng katta ulush Ozarbayjon hissasiga to‘g‘ri keldi — 1 milliard kub metrdan ortiq. Undan keyin Rossiya — 948,49 million kub metr va Eron — 919,33 million kub metr ko‘rsatkich bilan qayd etildi. Turkiya suyultirilgan tabiiy gazning butun hajmini Jazoirdan import qildi.

Tabiiy gaz iste’moli ham 25,2 foizga kamayib, 2,65 milliard kub metrni tashkil etdi. Iyul oyi oxirida gaz zaxiralari 5,64 milliard kub metrga yetdi va bir yil ichida 30,5 foizga oshdi.

Iyul oyida neft va neft mahsulotlari importi qariyb 4,52 million tonnani tashkil etib, yillik hisobda 6,9 foizga kamaydi. Shu bilan birga, xom neft importi 0,32 foizga o‘sib, 2,93 million tonnaga yetdi.

Neft va neft mahsulotlarining asosiy yetkazib beruvchisi Rossiya bo‘lib qoldi — 1,66 million tonna. Undan keyin Iroq — 653,5 ming tonna va Qozog‘iston — 508 ming tonna ko‘rsatkich bilan qayd etildi. Qozog‘istonning ulushi umumiy import hajmining 11,24 foizini tashkil etdi.