Trampning Xitoyga tashrifi yakunlari bo‘yicha Tayvan eng ziddiyatli masala bo‘lib qolmoqda

Trampning Xitoyga tashrifi yakunlari bo‘yicha Tayvan eng ziddiyatli masala bo‘lib qolmoqda – AQSh OAV.

The Wall Street Journal nashrining yozishicha, Si Jinpinning Tayvan bo‘yicha ogohlantirishi Pekin sammitining eng keskin nuqtasiga aylandi va Trampning ushbu uchrashuvni "tarixdagi eng yaxshi sammit" sifatida ko‘rsatishga bo‘lgan urinishlariga soya soldi.

Nashrning ta’kidlashicha, Vashington orol bo‘yicha o‘z siyosatini o‘zgartirmasligini oldindan bildirgan, ammo Pekin Tayvan mavzusini ataylab birinchi planga olib chiqqan. Oq uy muzokaralardan so‘ng rasmiy bayonotida Tayvan haqida umuman to‘xtalmadi, faqat keyinroq Davlat kotibi Marko Rubio AQShning Tayvan bo‘yicha siyosati o‘zgarishsiz qolishini alohida ta’kidlab o‘tdi.

Fox News telekanali ikkala tomon omma oldida savdo va iqtisodga urg‘u berishga harakat qilayotganiga qaramay, Tayvan masalasi yana Vashington va Pekin o‘rtasidagi asosiy keskinlik chizig‘iga aylanayotganini qayd etmoqda.

Telekanal, shuningdek, Senatdagi demokratlar yetakchisi Chak Shumerning munosabatini keltirdi. U Trampni Xitoyga qat’iy javob bermaganlikda aybladi. Senatorning so‘zlariga ko‘ra, Si Jinpin Tayvanni qo‘llab-quvvatlagani uchun AQShga amalda tahdid qilgan, Tramp esa "sukut saqlagan".

Bloomberg agentligining qo‘shimcha qilishicha, Pekin Si Jinpinning Tayvan bo‘yicha bayonotini muzokaralar hali yakunlanmasdan turib e’lon qilish haqidagi qarori ushbu signal naqadar jiddiy ekanini yana bir bor isbotlaydi.