Trampning Federal Qidiruv Byurosini siyosiylashtirishi AQSh xavfsizligiga tahdid solmoqda

AQSh prezidenti Donald Tramp Federal Qidiruv Byurosini (FQB) o‘z siyosiy manfaatlarini ilgari surish vositasiga aylantirmoqda va shu orqali agentlikka Amerika fuqarolari xavfsizligini ta’minlash hamda terrorizm va uyushgan jinoyatchilikka qarshi kurashishga to‘sqinlik qilmoqda.

Bu haqda The New York Times (NYT) gazetasidagi maqolada aytiladi.

"Trampning FQB uchun strategiyasi aniq. U uni MAGA (Make America Great Again - Amerikani yana buyuk qilish) harakati manfaatlariga xizmat qiladigan huquq-tartibot idorasiga aylantirmoqda. U o‘zi bilan birga o‘ynashdan bosh tortishi mumkin bo‘lgan agentlarni haydab, ularning o‘rniga sodiq odamlarni tayinlamoqda. U o‘z do‘stlari va ittifoqchilariga qarshi tergov tahdidini yo‘q qilishga urinmoqda, shuningdek, siyosiy tanqidchilarga qarshi kurashmoqda. Tramp Qo‘shma Shtatlarda demokratiyani zaiflashtirish va ko‘proq hokimiyatni o‘z qo‘lida to‘plash uchun ko‘p sa’y-harakatlarni amalga oshirmoqda, biroq FQBning siyosiylashuvi eng dahshatli choralardan biridir", - deb hisoblaydi maqola mualliflari.

Ularning fikricha, bu yondashuv FQBning terrorizm, xorijiy josuslik, bioxavfsizlik sohasidagi tahdidlar, uyushgan jinoyatchilik, onlayn firibgarlik, giyohvand moddalar savdosi bilan kurashishiga to‘sqinlik qiladi. Buning o‘rniga Amerika rasmiylari "noqonuniy muhojirlarni qidirish uchun FQB agentlarini yuboradi", chunki noqonuniy immigrasiyaga qarshi kurash Trampning saylovoldi kun tartibining asosiy masalalaridan biri edi.

"So‘nggi besh oy ichida FQBning ko‘plab agentlari, jumladan, yuqori martabali xodimlar va milliy xavfsizlik bo‘yicha ekspertlar ishdan bo‘shatildi, iste’foga chiqishga majbur bo‘ldi yoki unchalik muhim bo‘lmagan lavozimlarga o‘tkazildi. Yuzlab odamlar Tramp ma’muriyatining talablarini bajarishni istamagani uchun iste’foga chiqdi. Ular jamoat xavfsizligi uchun mas’ul bo‘limlarda bo‘shliq qoldirdi", - deya ta’kidlaydi gazeta.

NYT tahririyati Tramp va uning FQB direktori Kesh Patelni tanlashi agentlikning “obro‘si va samaradorligini” xavf ostiga qo‘yishiga va shu tariqa “Amerika fuqarolarining xavfsizligini xavf ostiga qo‘yishiga” ishonchi komil.